كيف اصور واعدل صور الانستقرام

مرحبا

كيفكم ؟؟

من فتره صارت تجيني كثير استفسارات عن تصويري ب انستقرام ايش الاضاءه اللي استخدمها ؟؟ وايش نوع الكام ؟؟

صوري بسيطه نوعا ما ..تقريبا كلها عن المنتجات بس اذا نزلتو تحت بالصور راح تشوفون الفرق والتطور بالتصوير وحتى بديت اتفادى اخطائي السابقه ومازلت اتعلم شي جديد واطبق ..

انا مو خبيره ولا مصوره محترفه لاكن بشاركم بعض الخطوات اللي ساعدت في تحسين تصويري..

طبعا للانستقرام استخدم كاميرا ايفون6اس  لا تنصدمون لاكن مو الكاميرا هي اللي تخلق صوره جميله بلعكس انت اللي تطلع الصوره جميله او رائعه ..

اول شي بتكلم عنه هو

 الاضاءه

الاضاءه هي العامل الموثر وبشكل كبير لما تاخذين صوره ب اضاءه منخفضه تبين الجوده مو كويسه وفيها حبيبات تخرب الصوره مهما كانت زاوية التصوير رائعه وبريفكت

انا استخدم اضاءه طبيعه (الشمس) من النافذه في اوقات معينه من النهار غالبا اصور من الساعه 8 ـ10 الصبح تكون قويه  ..هنا المنتج يكون بعيد شوي عن النافذه لان النور الساطع يخرب الصوره وخليها تبين قاسيه على العين

بعد العصر تكون اضاءه الشمس ناعمه في هالحاله اصور قريب من النافذه ولاحظت ان التصوير  من11-3 تبين ظل كبير للمنتج لان الشمس تكون ساطعه وقويه طبعا في حال كان تصويرك منتجات بس ..

الخلفيه

بالانستقرام معتمده على خلفيه بيضاء لان يعطي شكل نظيف واكيد نبي التركيز على المنتج مو شي ثاني ف الالوان الفاتحه افضل بنظري بعض الاحيان ادخل عناصر ثانيه مثل الماربل او اقمشه والورد ..

مو شرط تكونين مثلي لاكن حاولي دايم تكون الخلفيه متناسقه وماتشتت النظر..

الكاميرا

مثل ما قلت من قبل استخدم ايفون ..

كاميرا الايفون قاعده تطور مره عن مره وفيها اوضاع كثيره وتلقط فوكس ممتاز

لاكن في اشياء مهمه لازم تعرفينهاقبل اخذ الصوره  و اولها تنظيف الكاميرا او العدسه امسحيها بقماش قطن في كل مرره بتصورين لان ماتدرين كم مرره لمستي الكام وثاني شي استخدم الوضع المربع لانه متوافق مع الانستقرام نفس الحجم او المقاس 

واخر شي فعلي شبكة الخطوط في الكاميرا لان  الهدف او المنتج لازم يكون على نقطه التقاء الخط الافقي بالراسي وعندك اربع نقط او زاويا ابدعي فيها {حسيت اني اشرح رياضيات المهم ان شاء الله فهمتو

تروحين  الاعدادات ـ صور وكاميراـ شبكه او مربعات ـ حوليها الى الاخضر

التعديل

التعديل مهم يخلي الصوره تبين اجمل واحلى انا استخدم برنامج veco مجاني رائع قليل عليها هنا انا ارفع  الاضاءه شوي واتحكم بالسطوع واغير في temperature دايم اخليها بارده  على ازرق..

يعطيك خيارات كثيره وممكن تنشرين الصوره على اي تطبيق بدون حفظ 

يحتوي على فلاتر كثيره ومتعدده وممكن تلتقطين صور من خلاله ..

تحصلونه في الاب ستور هنا

هنا انستقرامي لو تحبين تابعيني mayaablog  (الظغط على اليوزر يحولك لحسابي مباشره)

هذا كل شي اذا عندكم استفسارات اتركوها تحت وبجاوب عليها كلها ان شاءالله

في امان الله 

2 comments تطبيقات ايفون, Reviews | تجاربي