جهاز شول لتنعيم القدمين | تجربتي و رأيي

مرحبا

ي هلا فيكم

في نوع من التقصير بالمدونه لعدة اسباب اولها اني كنت في سبات شتوي ..

خلص الشتاء و راجعه بقوه ان شاءالله ,,

طبعا الاغلب اذا مو كلنا نعاني من جفاف اسفل القدميين في بعض الاحيان و يرجع ل اسباب كثيره منها المشي حافي , عدم تجفيفهما من الماء بشكل جيد , قلة الترطيب , الماء الساخن , التعرض للهواء , التحسس من بعض انواع الصابون , امراض ومشاكل صحيه ...الخ

وللانه دخلنا فصل الربيع والصيف جاي وفي هاذي الفتره تكثر المناسبات ويكثر لبس الصنادل المفتوحه والكعب .

وطبعا القدميين مثل اي جزء من جسمك لازم تعتنين فيهم بشكل جيد لان مظهر الجلد المتشقق والجاف غير لطيف ابد ويدل على نوع من الاهمال ..

مثل ما عودتكم دايم بدون تكلف واشياء كثيره ممكن نحصل على قدميين ناعمه بثلاث خطوات فقط

بواسطة جهاز صغير ومخصص للاعتناء ب اسفل القدميين 

و هو جهاز شول المخصص للاقدام الجافه

هو فكرته نفس المبرد او الحجر المستخدم للازالة الجلد الجاف والميت لاكن بطريقة الطف واسرع وبدون الم وبذل مجهود كبير

الجهاز يتكون من راس قابل للتغير ويشتغل بالبطاريه لا يحتاج للشحن وله سرعه واحده فقط ..

استعماله جدا سهل وسلس 

كل المطلوب منك تستخدمينه على اقدام جافه تماما وتمررينه على الجزء الاسفل من الاقدام وبكل سهوله بتلاحظين ان الجلد يتطاير مثل ذرات الغبار وتنعم القدم بسرعه ..

يعيب الجهاز صوته المرتفع ,, بالنسبة لطريقة استخدامي لجهاز شول  استخدمه مره كل اسبوع ..

بعدها ننتقل للمرحلة الترطيب و استخدمي الكريمات و الزيوت اللي انتي حابتها  , انا استخدم كريم بالمرز بالكاكو وفيتامين ايه ..

اما الخطوه الثالثه هي لبس الشراب ليله كامله  عند النووم 

مع الاستمرار عليه بتلاحظين نعومه واقدام مثل البيبي ..

يتميز الجهاز بسهولة فك الراس وغسله تحت الماء و ينظف ما يحتاج تعقيد وايضا لو لاحظتي عدم فعالية الراس  مع الوقت ممكن تتخلصين منه وتستبدلينه براس جديد ..

و لفصل الراس فيه زر على جانب الجهاز مثل مو واضح بالصوره 

اخذت الجهاز من صيدلة بوتس..

اذا اعجبك الموضوع شاركيه في كل مكان😅 

كونو على تواصل 

انستقرام + سناب تشات +تويتر =mayaablog 

في امان الله 💗

14 comments Reviews | تجاربي, Skincare | العناية

تعرفو معي على موقع ROSEGAL

مرحبا 

كيفكم؟؟

اليوم بتكلم لكم عن موقع جديد للتسوق اون لاين يوفر الكثير من الخيارات ويناسب جميع الاذواق ...

من فتره ليست بطويله وصلني رساله في الايميل من احد اصحاب مواقع التسوق اون لاين وفي محتوى الرساله طلبو مني يكون بيننا تعاون عن طريق اني اختار قطع ب قيمه معينه ويرسلونها لي واقوم بتجربتها والكتابة عنها  وتقيم الموقع اذا يستاهل او لا, وافقت على طلبهم وتم الاتفاق على القطع وكل شي و وصلتني ..

** توضيح ** ماسأكتبه في الاسفل  يعبر عن رائي الصحيح ..

في البدايه احترت ايش اختار من عندهم الموقع جدا متنوع ومتجدد في ملابس واكسسورات وجزم و شنط .. الخ 

يلبي احتياجات المراءه والرجل .

لفت نظري الاسعار جدا متوسطه وفي متنازل الجميع و ايضاء الشحن مجاني ..

واجهه الموقع سهله والتصنيفات كثيره يعني لو في بالك شي محدد التصنيفات الموجوده بتسهل عليك البحث 

ويماشي الدارج حاليا من ناحية القطع الترند والكلاسيك  اقدر اقول كل وحده راح تحصل الستايل اللي يناسبها .

لما بديت اختار ما اكذب عليكم اخذت اكثر من اسبوع ,, في اشياء جميله مرراا حبيتها 

ارسلت لهم اللي اخترته لاكن للاسف الاغلب كان غير متوفر واضح اني تاخرت وكنت في دبي قلت خلاص ارسلو الموجود وبس لانه ما يمدي ارجع انقي واختار قالولي بس قطعتين متوفره وارسلوها وصلتني قبل كم يوم طبعا يوصلون على البريد السعودي ..

اتوقع اخذت اسبوعين على ما وصلت لي و احب انوه ان الموقع صيني لاكن جودة الملابس بنظري عاليه من ناحية المقاس والخياطه جدا ممتازه ..

الدفع بالفييزا او الباي بال....

جربت كثير مواقع بس صرفت النظر عنهم اما هذا بكرر التجربه ان شاءالله ...

يلا نشوف ايش اخذت وكيف نسقتهم ؟؟

تشوكر سواتر  ب لون بنفسجي فاتح

مرا حبيتها لما شفتها عندهم وما توقعت باللبس تطلع احلى و احلى

واخذت من عندهم بعد توب ابيض لفت نظري الكم واسع و مفتوح مع كشكشه بسيطه  جدا جميل لاكن ماسك علي شوي 

جاء في بالي اكثر من تنسيق له وعملي 

القي نظره على الموقع وتفرجي ..

هنا رابط الموقع ROSEGAL (اظغطي على الكلمة باللون الازرق )

روابط القطع اللي اخترتها 

CHOKER SWEATER

.

WHITE BLOUSES

اتمنى يعجبكم موضوع اليوم 

واذا حبيتي الموقع واخذتي من عندهم شي شاركيني الصور على

انستقرام:mayaablog

تويتر :mayaablog

سناب شات :mayaablog

في امان الله 

💖

8 comments Reviews | تجاربي

مشترياتي من موقع انستازيا | ANASTASIA HAUL

مرحبا 

كيفكم ؟؟طمنوني عنكم.

تاخرت في كتابة البوست لان حصلت لي ظروف غصب عني ..

بس اهم شي رجعت لكم ..

من فتره كان البلاك فرايدي وهو الجمعه السوداء واللي مايعرفها تكون اخر جمعه في نوفمبر وكل المحلات والمواقع الامريكيه تسوي تخفضيات و خوصمات توصل ال70% ..

وانا من فتره ودي بكم غرض من انستازيا ف قلت خليني انتظر واجرب يمكن اطلع بخصم يسوى .. مالكم بالطويله وخلوني استعرض لكم مشترياتي البسيطه .. وكانت ثلاث اشياء وجد حابه اجربهم ب اقرب فرصه ومنها اجرب الطلب من موقعهم اون لاين..

بالنسبه للطلب جدا سهل .. مايحتاج بريد امريكي ..

اما بالنسبه للتوصيل مقدر احكم عليه لانها فترة ظغط  بالنسبه لهم وتخفيضات لاكن صديقتي طلبت و وصل خلال اسبوع اما انا فطولت اخذت اسوعين تقريبا 

وايضا سحبو المبلغ دبل ,,وبعد الشحن رجعو الباقي+انهم بعد وصول الطلبيه ارسلو لي انها شحنت>>صح النوم انستازيا 😌

المهم وصلت وكانو مهتمين بالتغليف ,,حسافه ما صورت البوكس 

ايش طلبت و رائي فيه ..

*باليت MODERN RENASSANCE 

هذا الباليت شفت ريفيوهات عنه كثير وحبيته وكنت ابي اطلبه لاكن مقطوع من فتره وبالبلاك فرايدي لقيته بالموقع رجع من جديد بس ماعليه خصم كان ب42$ ..

تقريبا كله مات وكم لون ب لمعه وحسيت انه يناسب الشتاء خصوصا اني طايحه بغرام الالوان المحمره ..

بنفس الباليت فرشه مزدوجه جهة للتوزيع الشدو وجهه للدمج 

اكثر شي اعجبني او اذهلني فخامة الباليت صاير مثل الشامواه من برا وبصراحه خايفه عليه يتوصخ 😐

بالنسبه للشدو نفسه يعيبه انه يتناثر شوي ..بس الالوان قويه و واضحه ..

*باليتGLOW KIT 

عباره عن اربع درجات من اللمعه او الهايلايت برونزيه تقريبا تدرج من الفاتح للغامق 

دايم اسمع مدح عن اضاءت انستازيا وهذا قررت اخذه لانه اربع درجات في باليت واحد يعني اقدر اغير او ادمج اضائتين مع بعض

لفت نظرني انها ناعمه جدا حبوب اللمعه بالكاد تبين 

ف تعطي لوك متوهج ومشرق بدون يبين اوفر .

ومازال تحت التجربه ..

*قلم الحواجب BROW DEFINER

ومين ما يعرف قلم الحواجب من انستازيا ؟؟ اشهر من النار على العلم ..

انا جربت اقلام حواجب قريبه من فكرة انستازيا ,توم فورد وغيره وابد ابدا ماحبيته اللون بصعوبه يطلع وممكن تتساقط بعض شعرات الحاجب,,لاكن شفت هذا عليه مدح مو طبيعي مافي يوتويبر او بلوقر ما مدحته ..

بالنسبه لي ما فرق عن البقيه اللي جربتهم الا بشي واحد ان اللون يبين غامق مو خفيف ..

انا استخدم الجل دايم او القلم العادي ممكن هالشي اللي مخليني مو متقبلته ..

وبس هذا كل شي 

اتمنى افدتكم 

اذا جربتي شي من هاذي المنتجات اكتبي لي رايك او اذا مجربه شي مختلف من انستازيا شاركني ايضا؟؟

لنكن على تواصل من خلال:تعالو والقو التحيه 😍😍

انستقرام:mayaablog

تويتر :mayaablog

سناب شات :mayaablog

في امان الله 💓

7 comments مشترياتي, Makeup | مكياج, Reviews | تجاربي

سيروم فيتامينE من ذابودي شوب

ي هلا و مرحبا 

كيفكم؟؟

من منا لا تتمنى بشره نضره وخاليه من العيوب ؟؟

فيتامينE معروف انه مفيد للبشره يعطيها نضاره و يقضي او يقلل من التجاعيد 

كما انه يحمي بشرتك من المواد الضاره المتوفره بمنتجات التجميل 

فيتامين E يستخدم في كثير من علاجات الطفح الجلدي والالتهابات لتاثيره المفيد على المنطقه المصابه .

اقدر اقول ان فيتامين E مهم يكون عند كل بنت 

قبل شهر او اقل بدات استخدم سيروم فيتامين E من ذابودي شوب 

قوام السيروم مائي غير دهني خفيف جدا يتميز برائحه شبيه ب كريم الجليسوليد (الاحمر )

رائحه مقبوله وغير مزعجه على الاطلاق ..

بسب قوامه الخفيف يساعد البشره على امتصاصه بشكل سريع 

وعدة قطرات كافيه للوجه والرقبه لانه يمتد بكل سهوله 

                                                                               .
                                                                               .

طريقة استخدامي للسيروم فيتامينE 

استخدمه مسائا قبل النوم لانه يعمل وقت النوم خلال ساعات الليل 

بعد غسل الوجه بصابون او غسول لطيف اجففها واخذ ٣-٥ قطرات وامدها على كامل الوجه ومايتبقى بيدي اطبط فيه على الرقبه 

لا تغفلين عن الرقبه ما تستخدمينه للبشرة الوجه استخدميه عليها ايضا

ولتعزيز عمل السيروم استخدم كريم فيتامين E منTHEBODYSHOP ايضا 

                                                                                .

                                                                                .

ملاحظتي بعد استخدام السيروم ؟؟

بعد اول يوم لاحظت البشره ناعمه مثل القطن 

بعد اسبوع وجدت ان القشور في بشرتي اختفت بنسبة 60%

بعد اسبوعين بدت بشرتي نضره وناعمه وفتحت الاماكن الداكنه عندي 

وجدت انه اعطى بشرتي ترطيب قوي 

.

.

بشرح لكم الفرق بين الزيت والسيروم لفيتامين E

زيت فيتامينE ثقيل لا يمكن مده على البشره وايضا ذو قوام لزج يشبه العسل 

يفضل دائما خلطه مع كريمات العنايه للحصول على فوائده ..

اما السيروم كما قلت سابقا خفيف وسائل ويمكن استخدامه مباشره لست

 بحاجه لخلطه ..

                                                                               .
                                                                               .

ايضا يمكن استخدام السيروم مع المنتجات التجميليه مثل كريم الاساس بخلط نقطة او نقطتين معه ولا انصح بكثرته

اتمنى اعجبتكم تدوينتي 

لنكن على تواصل 

انستقرام +تويتر+سناب شات =mayaablog

ايضا ارحب بتعليقاتكم و استفسارتكم على الموضوع 

في امان الله 

9 comments Reviews | تجاربي, Skincare | العناية

8 نصائح لمساعدتك في الانتقال الى منزل جديد

مرحبا

ي هلا فيكم

اتمنى تكونون بخير

.

.

اذا متابعيني على الانستقرام والسناب اكيد عارفين اني نقلت من البيت الى بيت ثاني جديد ..

النقل موضوع مو سهل ويحتاج جهد و وقت  وترتيب بس في حالتي ماكان في وقت ابد

عندي اسبوعين ولازم اخلص فيه ..

في البدايه كنت مشوشه ما ادري ابدا من ايش ولا شي ولا كنت عارفه ايش بحتاج عشان ترتيب الاغراض ..

بعد البحث  وبعد ما جربت  حبيت انقل لكم تجربتي  ..يمكن احد يستفيد بشي لو بسيط

يلا نبدا

.

.

*لا تاخذين منتجات غذائيه قبل النقل ب اسبوعين

خلال الاسبوعين حاولي تستخدمين الاكل والاغراض الباقيه لا تقضين او تشترين اكل زياده 

 هذا الشي بساعدك ان ماتشيل هم الاكل الباقي و لا تحتارين كيف تاخذينه معك .

.

.

*لازم يكون عندك بوكسات بحجم كبير (كرتون)

ممكن تشترينها او تاخذينها من المحلات والسوبر ماركت ..

انا جمعتها من المحلات لان ما ادري وين تباع و مافضل اشتريها ..

*ابدئي بمكان واحد

ابدائي دايم بغرفه وخلصيها وبعدها اتجهي لمكان ثاني في البيت هذا الشي بخليك ما تفقدين تركيزك وتوترين 

وبعد تخلصين اسرع 

.

.

*تخلصي من الاشياء الزائده 

وانتي ترتبين الاغراض تخلصي من الاشياء عديمة الفايده والملابس الممزقه و الملابس التي لاترتديها من خمس اشهر 

اذا جيده رتبيها و خوديها للجمعيه 

.

.

*المطبخ

ابدئي بدولاب واحد وخلصيه اذا عند اوني من الزجاج استخدمي لها الرول البلاستيك اللي يجي دايم عليه زي الكور <<ان شاءالله فهمتو 

اذا ما حصلتيه استخدمي ورق جرايد 

لفي الورق على الكوب والباقي حطيه داخل الكوب 

الملاعق جمعيها مع بعض واربطيها او استخدمي تيب 

.

.

*ضعي معلومات على الصناديق 

كل صندوق خلصتي منه وقفلتيه اكتبي عليه اذا هو للمطبخ او الحمام او غرفة النوم او ...الخ 

هذا الشي يسهل عليك وقت الترتيب في البيت الجديد و تعرفين اماكن الاغراض بسهوله وسرعه ..

.

.

*جهزي شنطه قبل ليلة النقل 

حطي فيها غيار ومنتجات للشور والسكن كير وبعض السناكات 

لان احتمال تركيب الاغراض ونقلها يحتاج وقت .

.

.

*السوايل

اي شي سايل مثل الكريمات والعطور والمكياج يفضل تحطيه في اكياس بلاستيك منعا لتسرب ..

.

.

.

هاذي اهم نصايح طبقتها واستفدت منها 

كوني على تواصل معي 

سناب شات +انستقرام +تويتر=mayaablog 

.

.

.

في امان الله 

Leave a Comment moving|نقل, Reviews | تجاربي

تجربتي لموقع SHOPBOP

مرحبا
ي هلا و سهلا

بستعرض معكم تجربتي لموقع shopbop وهو موقع امريكي للملابس والشنط واحذيه واكسسورات هاي اند او من مصممين
 الموقع متنوع بشكل كبير
.
.
.
اول شي بتكلم عنه
التوصيل
يوصلون للسعوديه ومايحتاج بريد امريكي ولا شي
التوصيل سريع + مجاني تقريبا ٣-٥ ايام عمل

خدمة العملاء رائعه جدا لاني اخترت توصيل بثلاث ايام لاكن وصلني اعتذار منهم ثاني يوم لانهم مشغولين ب ايفنت وكذا
ايضاء عندهم تغليف للهدايا

وصلتني الشحنه مغلفه بشكل جميل
الشحن كان على الدي اتش ال
ويوجد عندهم  خدمة استرجاع خلال 15 يوم

عند الدفع وانهاء الطلب عطوني كوبون خصم ٣٠٪  ماكان وقتها في خصم ف مادري اذا دايم كذا او لا..
.
.
.

نجي لشنطتي الجميله وهي كروس بودي اخذتها باللون الاسود لاني محتاجه شنطه كلاسيك للمناسبات   من ريبيكا مينكوف وهي  مصممه امريكيه اشتهرت بالفتره الاخيره بتصاميمها العصريه والكلاسكيه والاسعار المتوسطه

الشنطه تحتوي من الداخل  ع جيوب واحد منها ب سحاب ومن الخلف بعد
وحجمها كويس متوسطه
وكرت عن العنايه بالقطعه ..

الشنطه كان سعرها ب290$ وبعد الخصم  صارت ب221$
رابط الشراء هنا

وهذا كل شي الموقع يستحق التجربه لان القطع كلها اصليه والشحن مجاني بعد


لنكن على تواصل في انستقرام وتويتر وسناب شات =mayaablog 

في امان الله

2 comments تجربتي،تسوق،اون لاين, Reviews | تجاربي

كيف اصور واعدل صور الانستقرام

مرحبا

كيفكم ؟؟

من فتره صارت تجيني كثير استفسارات عن تصويري ب انستقرام ايش الاضاءه اللي استخدمها ؟؟ وايش نوع الكام ؟؟

صوري بسيطه نوعا ما ..تقريبا كلها عن المنتجات بس اذا نزلتو تحت بالصور راح تشوفون الفرق والتطور بالتصوير وحتى بديت اتفادى اخطائي السابقه ومازلت اتعلم شي جديد واطبق ..

انا مو خبيره ولا مصوره محترفه لاكن بشاركم بعض الخطوات اللي ساعدت في تحسين تصويري..

طبعا للانستقرام استخدم كاميرا ايفون6اس  لا تنصدمون لاكن مو الكاميرا هي اللي تخلق صوره جميله بلعكس انت اللي تطلع الصوره جميله او رائعه ..

اول شي بتكلم عنه هو

 الاضاءه

الاضاءه هي العامل الموثر وبشكل كبير لما تاخذين صوره ب اضاءه منخفضه تبين الجوده مو كويسه وفيها حبيبات تخرب الصوره مهما كانت زاوية التصوير رائعه وبريفكت

انا استخدم اضاءه طبيعه (الشمس) من النافذه في اوقات معينه من النهار غالبا اصور من الساعه 8 ـ10 الصبح تكون قويه  ..هنا المنتج يكون بعيد شوي عن النافذه لان النور الساطع يخرب الصوره وخليها تبين قاسيه على العين

بعد العصر تكون اضاءه الشمس ناعمه في هالحاله اصور قريب من النافذه ولاحظت ان التصوير  من11-3 تبين ظل كبير للمنتج لان الشمس تكون ساطعه وقويه طبعا في حال كان تصويرك منتجات بس ..

الخلفيه

بالانستقرام معتمده على خلفيه بيضاء لان يعطي شكل نظيف واكيد نبي التركيز على المنتج مو شي ثاني ف الالوان الفاتحه افضل بنظري بعض الاحيان ادخل عناصر ثانيه مثل الماربل او اقمشه والورد ..

مو شرط تكونين مثلي لاكن حاولي دايم تكون الخلفيه متناسقه وماتشتت النظر..

الكاميرا

مثل ما قلت من قبل استخدم ايفون ..

كاميرا الايفون قاعده تطور مره عن مره وفيها اوضاع كثيره وتلقط فوكس ممتاز

لاكن في اشياء مهمه لازم تعرفينهاقبل اخذ الصوره  و اولها تنظيف الكاميرا او العدسه امسحيها بقماش قطن في كل مرره بتصورين لان ماتدرين كم مرره لمستي الكام وثاني شي استخدم الوضع المربع لانه متوافق مع الانستقرام نفس الحجم او المقاس 

واخر شي فعلي شبكة الخطوط في الكاميرا لان  الهدف او المنتج لازم يكون على نقطه التقاء الخط الافقي بالراسي وعندك اربع نقط او زاويا ابدعي فيها {حسيت اني اشرح رياضيات المهم ان شاء الله فهمتو

تروحين  الاعدادات ـ صور وكاميراـ شبكه او مربعات ـ حوليها الى الاخضر

التعديل

التعديل مهم يخلي الصوره تبين اجمل واحلى انا استخدم برنامج veco مجاني رائع قليل عليها هنا انا ارفع  الاضاءه شوي واتحكم بالسطوع واغير في temperature دايم اخليها بارده  على ازرق..

يعطيك خيارات كثيره وممكن تنشرين الصوره على اي تطبيق بدون حفظ 

يحتوي على فلاتر كثيره ومتعدده وممكن تلتقطين صور من خلاله ..

تحصلونه في الاب ستور هنا

هنا انستقرامي لو تحبين تابعيني mayaablog  (الظغط على اليوزر يحولك لحسابي مباشره)

هذا كل شي اذا عندكم استفسارات اتركوها تحت وبجاوب عليها كلها ان شاءالله

في امان الله 

2 comments تطبيقات ايفون, Reviews | تجاربي

Review| باليت الكونتور والاضاءه من NYX

مرحبا

كيفكم ؟؟

اليوم موضوعي عن باليت الكونتور من نكس مثل مو ظاهر من العنوان..

بالبدايه انا افضل الكونتور الباورد على الكريمي لسهولة الدمج وبسرعه عكس الكريمي ياخذ وقت بالدمج وبالنسبه للباودر اخلصه بخمس دقايق ..

هذا الباليت يعتبر صفقه رابحه لانه من منتجات الدرق الستور ويحتوي على تنوع بالدرجات وسعره في متناول اليد

و جودته عاليه ...

يحتوي على اربع درجات للكونتور واربع درجات للاضاءه اثنتين ب لمعه..

و درجة البنانا جدا رائعه فيه وتنور منطقة تحت العينين اما بالنسبه للكونتور ماكانت كلها مناسبه لي لان اول درجه غامقه  من اليمين جدا ومايله للبني الصريح و اخر درجتين من جهة اليسار جايه على برونز اما ثاني درجه من اليمين جدا رائعه لانها مايله على الرمادي واللون بارد ف جدا مناسبه للكونتور او التحديد بس ما تنفع لتحديد الانف..

للانف استخدم اخر لونين من اليسار ..

من خلال استخدامي له اكثر من مره لاحظت انه سهل الدمج يتوزع بسهوله مااخذ وقت معه اللون غني ويبين من اول مرره وملمسه مخملي ..

اما بالنسبه للاضاءه في درجه مايله على وردي بلمعه جدا جميله واستخدمها  اما الثانيه ب لون ابيض مااحس انها تناسب لون بشراتنا ممكن تناسب لبشره فاتحه جدا مثل نيكول كدمان

اما البنانا مثل ماقلت رهيبه لتنوير الوجة او بعض الاماكن ..

مميزات الباليت الكونتور من نكس:

*سعره مقبول

*متنوع بدرجات الكونتور يناسب اغلب البشرات من الفاتحه للغامقه

*اللمعه جدا ممتازه

*درجة البنانا جميله واستخدمها بكثره

*حجمه مناسب

*اللون واضح جدا

*سهل التوزيع والدمج

هنا السواتش 

لاحظو درجة الكونتور الثانيه والرابعه(اليمين) اكثر شي استخدمه ومناسب لتحديد الوجه ..

و بكذا وصلت لنهاية الموضوع اتمنى اكون افدتكم 

وبالنسبه للاماكن الشراء 

سنتربوينت - امازون 

تابعوني على انستقرام وسناب شات :mayaablog 

في امان الله 

Leave a Comment Makeup | مكياج, Reviews | تجاربي

Dry Brushing | تمشيط الجسم الجاف ايش يعني وكيف يستخدم

مرحبا 

كيفكم ؟؟

.

.

موضوعي اليوم عن روتيني الاسبوعي بعنايتي بالجسم +تقنية التمشيط الجاف للجسم 

تعتبر سر من اسرار الجمال والنعومه 

.

.

مثل ما تعودتو علي مااحب الخلطات والخرابيط الكثيره انا اعتمد على اشياء سهله وبسيطه وماتاخذ وقت 

مرره بالاسبوع اسوي هذا الروتين وجدا نتايجه مبهره من نعومه والتخلص من المسامات اللي تظهر بعد الحلاوه او الشمع + توحيد اللون ..

.

.

.

اول شي ابدا فيه هو الفرشه هاذي استخدمها قبل الاستحمام  والفرشه تكون جافه طبعا وابدا امررها من تحت لفوق على نفس المكان ثلاث مرات وابد مافي الم قوي شي يدغدغ بس ههههه الخطوات تكون باتجاه القلب  اهم شي لا يكون بقوه عشان ماتسببين بخدش الجلد وابتعدي عن اماكن الجروح اذا عندك..

الفرش هاذي تجي ب اشكال واحجام مختلفه وهي مخصص لكذا تحصلونها في ذا بودي شوب 

فايدة هذا التكنيك ينعم بشره الجسم بدرجه كبيره  والتخلص من الجلد الميت ويقلل من السليوليت  واذا عندك سترش ماركس يساعد بتخفيفها ايضا يساعد بتنشيط الدوره الدمويه  وتجدد الطاقه بالجسم هذا التكنيك يسمى التمشيط الجاف او (Dry brushing) نتائجه مبهره يا بناات 

.

.

.

.

بعد كذا ابلل الجسم واستخدم سنفره من باث اند بودي وركس بالسكر جدا جميله ريحتها فظيعه مع التقشير يبدا السكر يذوب اللي يميزها ان معها رغوه يعني ماتحوس الدنيا والحمام تكرمون مثل باقي السنفرات 

اوزعها على الجسم وباستخدام القفاز  من ذابودي شوب ابدا افرك بحركات دائريه خفيفه ..

.

.

واكمل خطوات الحمام المعتاده من شور جل وشامبو ..

اخر شي الترطيب 

من الاشياء اللي جابت نتيجه قويه معي هو زيت جوز الهند اخذ قطرات بسيطه جدا وازعها على جسمي بعد  التجفيف من الماء ولا تخافون ما يكثر الشعر بس نقط بسيطه او ممكن تستخدمين زيت مخصص للجسم ..

وبعد كذا استخدم كريم او لوشن ومرات زبده الشيا حاليا استخدم جيرجينز خفيف ما يدبق و ريحته مستحبه ..

.

.

هذا كل شي 

اتمنى اكون افدتكم وكانت تدوينه خفيفه عليكم 

تهمني تعليقاتكم او لو جربتو طريقتي شاركوني 

تلاقوني على تويتر وانستقرام وسناب شات بنفس الاسم :mayaablog 

في امان الله 

8 comments Reviews | تجاربي, Skincare | العناية

تقيمي لفرش سيقما | REVIEW

مرحبا

كيفكم؟؟

حابه اتكلم اليوم عن فرش سيقما وجودتها صار لي استخدمها من اربع سنين تقريبا وما غيرتها للان ولا حاولت اجرب غيرها حسيت انها مكفيتني وللحين كانها جديده ..

فرش سيقما تتميز بالشعيرات الناعمه جدا و سعرها المرتفع شوي  اتذكر المجموعه اللي اخذتها ١٢ فرشه ب ٣٠٠ ريال 

اعجبني فيها ان شعر الفرش ما تساقط الى الان ومع الغسل والاستخدام ماخشنت او خربت 

قبل كنت استخدم فرش يطيح الشعر على وجهي قمة المعاناه ..

المجموعه هاذي  تتكون من ١٢ فرشه اربع للوجه وثمان فرش للمكياج العيون 

في فرشة مفقوده صراحه لاني ماستخدمها فقررت استغني عنها 

يلا نبدا 

.

.

.

فرش الوجه  (مرقمه بالترتيب)

 ١*فرشة الفاونديشين رقمها F60

جدا ممتازه للتوزيع الاساس السائل ما تظهر خطوط على سطح البشره  مثل بعض الفرش بفضل راسها الحاد يسهل توزيع  الاساس في الاماكن الصغيره مثل زاوية العين او الانف 

استخدمها غالبا..

٢* للكونتور رقمها F40

مثل مو شايفين تجي مشطوفه او مثل الزاويه  سهله الاستخدام وحجمها مناسب انا مرات استخدمها للبلش بعد زاويتها المشطوفه تساعد ان الكونتور يجي مظبوط لانك بتاخذينه من فوق لتحت على نفس الخط..

٣* فرشة الباودر رقمها F30

كبيره جدا سطحها غير متساوي  توزع الباودر بشكل ممتاز مشكلتها انها تاخذ كميه كبيره من المنتج  شعرها نااعم جداااا ..

فرش العيون 

 ١* للاي شدو رقمها E55

استخدمها لتوزيع الشدو على الجفن المتحرك واسفل الحاجب شعرها ناعم ..

2* فرشة الكونسيلر رقمها F70

هاذي الفرشه جدا ممتازه في توزيع الكونسيلر تحت العين او تحت الحاجب حجمها صغير يعيبها هالشي لان تاخذ وقت ..

٣*فرشة مشطوفه  رقمها E70

تنفع للجفن الثابت او لو حابه تسحبين الشدو للبرا لانها مايله بتعطيك لوك جميل ..

٤* فرشه الشدو كبيره رقمهاE60

 اذا ابي اوزع لون واحد على كل العين بحكم حجمها هي كبيره وبيني وبينكم نادر استخدمها ..

٥* فرشة مشطوفه صغيره رقمها E65

لها استخدامين للحواجب او الاي لاينر طبعا للحواجب اشوف انها ممتازه لانها صغيره فترسمين فيها حواجبك بدقه وشعره شعره .

6* فرشة الاي لاينر E05

مااستغني عنها ورسم الكحل فيها اشوفه اسهل من المشطوفه لانك تتحكمين بالعرض وشكل الخط من برا..

7*فرشة القلم رقمها E30

لتوزيع الشدو تحت العين او الاضاءه في زاوية العين صراحه مااستغني عنها ..

٨* فرشة الدمج ورقمها E40

محبوبة الكل اللي عندي كبيره شوي لاكن دمج الشدو فيها رائع استخدمها دايم ..

.

.

.

غسل الفرش والعنايه فيها

يفضل استخدام صابون مخصص او غسول الوجه اللي تستخدمينه لاكن ابد لاتستخدمين شامبو الاطفال لان لاحظت انها تيبس او تخشن شوي بعد الغسل ..

تبللين الفرشه بالماء وتحطين الغسول وتحركينها على باطن اليد يمين ويسار وبشكل دائري وبعدها نظفيها من الغسول ونشفيها بشكل واقف  بالطول يعني الشعر تحت ..

رابط الشراهنا

ان شاء الله اكون وفقت وقدرت افيدكم 

تابعوني على تويتر وانستقرام وسناب شات :mayaablog 

اسعد بتلقي تعليقاتكم هنا 

.

.

.

في امان الله

2 comments Reviews | تجاربي

مشترياتي من جولي شيك +يستحق التجربة او لا؟؟

مرحبا

كيفكم؟؟

وش مسووين ؟؟

موضوعي اليوم مشتريات طبعا ومن ما يحب يشوف المشترياات ؟؟

من موقع جولي شيك  الغني عن التعريف في كل شي ملابس احذيه شنط اكسسورات ..الخ كل شي تقريبا 

قبل ابدا بقولكم كم نقطه ...

بالنسبه لي ماعندي ثقه بالمواقع الصينيه من ناحية الجوده والمصداقيه وسرعه التوصيل 

قبل جربت موقعين فاشليين جدا الشحنات تتاخر والاغراض توصل مختلفه عن ماهي عليه بالموقع 

انا ما اطلب ملابس مستحييل لانو مااثق بجودة اللبس والمقااس ..

في كم بنت قالو انهم جربو الملابس من جولي شيك وكانت برفيكت بعد ماعرضت مشترياتي بالسناب..

ب تقولون ليش جولي شيك جربتيه طيب دامك مو مقتنعه ؟؟

انا من فتره ادور منظمات للشنط السفر واحصلها بسعر مبالغ فيه عند المتاجر في الانستقرام  

قالت لي وحده هم يجيبونها من جولي شيك والسعر فرق ..

توكلت وطلبت ..

طلبت بالعشر الاخيره من رمضان وكان في عرض ان الشحن مجانا قلت فرصه وبرضو مقتنعه ان بيجي نص عشره والشحنه ما وصلت .. 

طبعا في الموقع كانو مبينين ان الطلبات بتشحن بعد العيد ..اول يوم دوام للشركات الشحن بعد العيد استلمت شحنتي يعني تقريبا من ٣-٥ ايام عمل تخيلوو ماتاخرت ابدا شغله تنحسب لهم 

ثاني شي فتحت الشحنه لقيت الاغراض مهتمين بالتغليف بشكل رائع والاكواب مغلفه صح لان دايم المواقع الصينيه ماعندها اهتمام بالشحنه ممكن توصل في شي منكسر بس جولي شيك جدا كانو مهتمين ..

مااطول عليكم تعالو اوريكم المشتريات ..

اول شي 

شنطة ظهر صغيره وشكلها كيوت جودتها ممتازه ما توقعت وحجمها جدا مناسب تفيدني بالسفر عشان الكام والايباد مررررا حبيتها ..

رابط الشرا هنا

ثاني شي 

منظمات للشنطة السفر تحتوي على سبع قطع اشوفها مناسبه لي وخامتها كويسه ترتب شكل الشنطه اهم شي

رابط الشراهنا

ثالث شي 

كيس للاحذيه تكرمون جدا مناسب الحجم وخامته ثقيله شوي طبعا بالصوره انا حاطه شوز وسليبر بس ممكن ياخد فلات بعد ..

رابط الشراهنا

رابع شي 

اكياس للملابس المتسخه اربع احجام مختلفه هذا الشي مهم ودايم اتبهذل كنت اخذ اكياس بلاستيك بس ماتنفع لان مع حركة الشنطه تطلع الملابس وتنحاس..

رابط الشراهنا

اخر شي كوب شاي جدا عجبني والنقشه تاخذ العقل شي انتيك كذا وحجمه كبير عندهم اشكال كثير وجمييله 

رابط الشراهنا

المواقع يستحق التجربه ..

شاركوني تعليقاتكم هنا 

ولا تنسون متابعتي بالانستقرام وتويتر وسناب شات ::mayaablog 

في امان الله .. دمتم سالمين

4 comments مشترياتي, Reviews | تجاربي

كيف تحصلين على شفاه ناعمه

مرحبا

كيفكم ؟

اليوم موضوعي عن الشفايف اول شي يلفت نظري بالبنت اذا ناعمه او متشققه لان منظر الشفايف التعبانه مقزز والروج يبين مبهذل !!

بتكلم عن روتيني البسيط والغير متكلف وفعلا تغيرت شفايفي وصارت ناعمه ومورده اكثر قبل كانت تتقشر ومسمره وع طول ناشفه مع اني كنت ارطبها ب استمرار بس اكشفت ان الترطيب ما يكفي لحاله !!!😭

قبل خلوني اكلمكم عن بعض العادات الخاطئه المسببه للجفاف واسمرار وتشقق الشفايف:

1-لعق الشفايف يعني اذا مررتي لسانك عليها

2-استخدام ارواج رديئه او رخيصه

3-عدم شرب الماء بشكل كافي

4-انعدام الترطيب

5-الشمس+ نقص بعض الفيتامينات

تقريبا هذا اكثر شي يسبب تشقق الشفايف ومرات يكون التهاب فطري !!

روتيني انا جدا بسيط مااحب المنتجات الكثيره والحوسه اللي تكرهك بالشي معتمده على خطوات بسيطه وسهله وبشكل اسبوعي ويومي اللي هي    (تقشير +ماسك + ترطيب)

التقشير بشكل اسبوعي وبسيط  والماسك ممكن مرتين بالشهر اما الترطيب كل يوم وعلى مدار اليوم ..

الخطوه الاولى: طيب ايش نحتاج للتقشير !؟؟

طريقتي صراحه ممكن تكون معروفه للكل مو شي جديد وهي

فازلين + سكر + فرشه اسنان ناعمه او ممكن تكتفين ب اصبعك

طبعا اول شي اخلط كميه صغيره من الفازلين مع سكر ناعم الحبيبات وبعدين ابلل شفايفي بماء وامد الخليط اللي سويته

وافرك بشكل دائري وخفيف بواسطة الفرشه اهم شي لا تتحمسون وتسونه بقوه لانه ممكن يسبب خدوش للشفايف والتهاب

اسويه مره بالاسبوع وبعدها ارطبها ..

الخطوة الثانيه :الماسك

واكثر ماسك عجبني و هو مخصص للشفاه الجافه ماسك من ذا فيس شوب مررا جميل ويرطب بشكل ملحوظ وريحته مقبوله

تتركينه من 10-20 دقيقه وبعدها بتحصلين شفايفك ناعمه مرااا مفعوله يجنن يا بنااااات ...

الخطوه الثالثه :الترطيب

قبل كنت استخدم بزليين  بالعسل كان جميل بس مفعوله يطول عشان يبين ولو نسيت يوم ما حطيت شفايفي تيبس وكنت استخدم مرطبات ثانيه بس ماشفت لها مفعول لحد ما طحت على مرطب زبدة الكاكو من اي هيرب من اول استخدام عطاني نعومه وجد مااستغني عنه وسعره مرره رخيص .

انتبهي تحطين فازلين وتطلعين بالنهار لانه راح يسمر شفايفك ..

وبس هذا موضوعي  كتبته لان دايم اشوف بنات يعانون من تشقق الشفاه مع انها ترطب !!

اسعد بتعليقاتكم هنا او في

الانتسقرام وتويتر والسناب :mayaablog

في امان الله ❤️

1 comment Reviews | تجاربي, Skincare | العناية